A Audiencia Provincial de Pontevedra ten previsto xulgar a un veciño de Vilagarcía de Arousa acusado de almacenar un importante arsenal na súa vivenda sen contar con ningún tipo de permiso legal.
A Fiscalía solicita para el unha condena que suma 11 anos de prisión.
Segundo o escrito de acusación, os feitos remóntanse a 2022, cando o investigado gardaba no seu domicilio até 14 armas de fogo.
Entre elas figuraban distintos revólveres, armas curtas, unha carabina e mesmo unha pistola de dous canóns.
A ese arsenal sumábase unha inxente cantidade de munición con máis de 4.500 cartuchos de diversos calibres, ademais de proxectís e compoñentes destinados á recarga.
A investigación apunta a que o acusado non só acumulaba munición, senón tamén material específico para fabricala.
Na vivenda atopáronse centos de puntas e vainas, caixas de fulminantes e unha notable cantidade de pólvora, xunto con ferramentas especializadas. Para o Ministerio Público, todo iso evidenciaría unha clara intención de producir cartuchería de forma clandestina.
O rexistro tamén permitiu localizar accesorios vinculados ao uso de armas, como silenciadores, miras telescópicas ou dispositivos de carga rápida, ademais de documentación relacionada con armamento, explosivos e técnicas de recarga.
O procesado, sempre segundo a Fiscalía, carecía de calquera licenza ou autorización oficial que lle permitise posuír armas ou fabricar munición, requisitos que dependen da Garda Civil.
Parte do material, engade a acusación, sería adquirido de forma irregular entre 2013 e 2021 a través da web todocoleccion.net.
A vista, sinalada para este xoves día 30, non corresponde ao xuízo, senón a unha audiencia preliminar destinada a explorar un posible acordo entre as partes. Celebrarase a porta pechada e, si hai conformidade, esta farase pública posteriormente.
Nesta fase, na que participan Fiscalía, acusados e partes implicadas, tamén se revisan as probas e posibles cuestións que poderían afectar ao futuro xuízo, como a súa suspensión ou a nulidade de probas.