Dende este luns 11 de novembro e ata o próximo día 28 os propietarios de preto de 900 terreos afectados polo primeiro tramo da circunvalación están convocados polo Ministerio de Fomento no Pazo da Cultura para o levantamento das actas previas á ocupación.
Estes propietarios recibiron nas últimas semanas as correspondentes citacións para este tramo entre Vilaboa e A Ermida, que terá sete quilómetros e que en Pontevedra afecta a 884 terreos das parroquias de Marcón, Tomeza e Canicouva.
Os veciños deberán acudir cos "documentos acreditativos da súa titularidade e o último recibo do Imposto sobre Bens Inmobles".
O municipio de Pontevedra inicia así o proceso que acaba de concluír en Vilaboa, onde o número de terreos e veciños afectados é maior que en Pontevedra xa que ademais do tramo propio da A-57, se inclúe un amplo ramal de conexión coa N-550.