A comisión mixta do 1,5% Cultural, integrada polos ministerios de Fomento e de Educación, Cultura e Deporte, aprobou o financiamento da rehabilitación do Pazo de Quintáns. Desta forma destinaranse 903.000 euros para os traballos de recuperación e posta en valor deste espazo de patrimonio histórico situado en Noalla, Sanxenxo.
Segundo o goberno local da vila turística, estes fondos lográronse grazas á aprobación dos orzamentos das anualidades 2017 e 2018 no Concello e ás xestións realizadas polo alcalde Telmo Martín en Madrid.
Nos orzamentos municipais de 2017 e 2018 reserváronse dúas partidas de 140.000 e 340.341 euros respectivamente coa finalidade de rehabilitar o pazo, que se sumarán a estes 903.000 de Fomento.
Desde o goberno local afirman que o orzamento estimado inicialmente para estes traballos ascendía a 1.900.000 euros. Pero o equipo de Telmo Martín confía en que no concurso para a adxudicación das obras se rexistren ofertas á baixa, que diminúan esa cifra. Tamén esperan a que o inicio das obras se leve a cabo antes do 30 de maio de 2019.
O Pazo de Quintáns atópase en mal estado de conservación con deterioración da estrutura e colapsos na cuberta e forxados. A intención do proxecto é converter esta edificación nun Museo da Paisaxe Cultural da Lanzada, como unha sala do Museo de Pontevedra, que presente o conxunto patrimonial da antiga xurisdición, a partir dos achados arqueolóxicos atopados nesta contorna.