Pontevedra disporá de máis de 8,7 millóns de euros, procedentes dos fondos europeos FEDER, para desenvolver un plan de acción que suporá a "transformación radical", segundo o goberno municipal, dos barrios de Monte Porreiro, A Seca, Valdecorvos e A Parda.
A senda marcada para esta estratexia de desenvolvemento integrado local (EDIL) está valorada en 14.550.506 euros, explicou o concelleiro responsable da área de facenda, Raimundo González, dos cales o 60% -8.730.304 euros- correrá a cargo destes fondos europeos.
O 40% restante, é dicir 5.820.202 euros, será a achega que deba facer o Concello.
González, que informou este venres da resolución inicial desta convocatoria, destacou que todos os proxectos "maduros" que o executivo pontevedrés incluíu no EDIL "van estruturar uns barrios que son fundamentais para a cidade".
O goberno municipal solicitara financiamento para un plan de 20 millóns de euros, pero segundo Raimundo González, aínda que a resolución destes fondos non chega a esa cantidade "non cae absolutamente ningún" dos proxectos que se incluíron no EDIL.
Cando saia a resolución definitiva, sostivo o concelleiro de Facenda, unha das posibilidades é que algunha das liñas presentadas "non sexa subvencionable" e, a maiores, contémplase que, en función da execución, esa senda de 14,5 millóns "poida incrementarse"
Ademais, engadiu González, o Concello podería achegar máis fondos propios, polo que o executivo local confía en alcanzar eses 20 millóns "por diferentes camiños".
Dentro deste EDIL, a maior parte das actuacións realizaranse en Monte Porreiro a través dun plan que foi bautizado como 'Monte Porreiro Revive', valorado nuns 11 millóns.
Alí contémplase o novo pavillón deportivo -coa nova praza sobre a cuberta- (6,41 millóns), a renovación do campo de fútbol e rugby (1,19 millóns), a rehabilitación do centro social (880.000 euros) ou a creación dunha aula Smart TIC (100.000 euros).
A estas actuacións súmase a rehabilitación integral e reforma urbana das principais rúas do barrio, entre elas Reino Unido, Irlanda ou Alemaña (2,37 millóns).
Outro tres millóns serían para conectar os barrios da Seca e Valdecorvos, unha estratexia na que figuran tres actuacións diferentes.
Así, recóllese o parque inundable en Valdecorvos e o tratamento de toda a contorna natural (1 millón), a recuperación do curso fluvial do río Valdecorvos (500.000 euros) e a creación dun novo espazo de centralidade sobre a vía do ferrocarril na Seca (1,52 millóns).
Dentro do apartado 'A Parda Verde', o EDIL aposta por destinar a este barrio até 5,31 millóns de euros, principalmente para financiar a creación do parque urbano máis grande da cidade, con 34.000 metros cadrados, cuxas obras xa comezaron.
Por último, 700.000 euros serán para diversas actuacións en materia de administración electrónica, entre elas, un novo portal de transparencia, a incorporación da IA na atención ao público, ferramentas para a participación cidadá ou medidores de ocupación, ruídos ou luz.
"É moi boa noticia para Pontevedra", reiterou Raimundo González, que detallou que aínda que o Concello aspiraba a lograr 12 millóns, recibirá 8,7 millóns, "exactamente igual" que as cidades da Coruña, Vigo, Ourense, Santiago ou Lugo.