Tras o seu enésimo precinto, executado hai apenas unha semana, a tapería clausurada en Combarro porque, segundo o Concello de Poio, non ten licenza de actividade, volveuno a tentar. Iso si, sen éxito.
Os veciños da zona, que presenciaron como durante os últimos días os seus propietarios meteran material novo no local, alertaran desta situación.
E grazas a esa información, a Policía Local impediu que volvesen abrir as súas portas.
Os seus responsables romperon o precinto e, este mesmo domingo, tentaron montar a terraza do establecemento, pero os axentes impedíronllo.
Segundo confirman a PontevedraViva desde o goberno municipal, "xa está de novo precintado e todo confiscado".
Este novo intento sumarase ao expediente aberto contra este local.
Esta tapería, situada na Rúa 3 de Combarro, xa fora precintada en agosto de 2025 por carecer de licenza, por incumprimentos urbanísticos e por un amplo historial de denuncias por molestias, ruídos, cheiros, fumes ou apropiación indebida de espazo público.
A Consellería de Sanidade tamén decretou o peche sanitario do local tras detectar varias deficiencias e incumprimentos das súas condicións hixiénico-sanitarias.
De forma paralela á vía penal, o Concello de Poio mantivo aberta a vía administrativa, impuxo multas coercitivas e continuou tramitando as medidas necesarias para facer cumprir a legalidade con novos decretos de peche e precintado.
Engade Pontevedra Viva como fonte preferida de Google de balde
Mantente informado coas últimas noticias de actualidade.