Galflu, o ensaio pioneiro que probará a vacina antigripal de alta carga en galegos de 65 a 79 anos

Pontevedra
03 de novembro 2024
Actualizado: 7:20

O investigador Federico Martinón pon en valor que as persoas que participaron na primeira fase do GalFlu presentaron taxas de ataque de infección por gripe máis baixas en comparación coa poboación non vacinada

Xornada de vacinación de gripe e covid no edificio da Xunta
Xornada de vacinación de gripe e covid no edificio da Xunta /

O conselleiro de Sanidade, Antonio Gómez Caamaño, anunciou esta semana o inicio da segunda fase do ensaio clínico GalFlu para probar a eficacia da vacina de alta carga contra a gripe en 70.000 galegos de 65 a 79 anos, coincidindo co inicio da vacinación fronte á gripe e o covid nos grandes recintos.

Este estudo clínico, no que Galicia é pioneira, está a levarse a cabo a través da colaboración da Dirección Xeral de Saúde Pública da Consellería de Sanidade e investigadores do grupo de Xenética, Vacinas e Enfermidades Infecciosas do Instituto de Investigación Sanitaria de Santiago (IDIS).

Federico Martinón é o investigador principal do proxecto que, segundo explicou, pretende analizar si a vacina antigripal de protección reforzada, que é a que xa se está aplicando a maiores de 80 anos, é igualmente beneficiosa para as persoas de menor idade, entre os 65 e 79 anos.

Deste xeito, as persoas dese rango de idade que acudan a vacinarse nos grandes recintos habilitados en todas as áreas sanitarias poderán participar voluntariamente neste estudo.

O doutor Martinón informou que 59.490 cidadáns galegos de idades comprendidas entre 65 e 79 anos participaron na primeira tempada do estudo, cuxo recrutamento se fixo entre o 26 de outubro e o 26 de novembro do pasado ano.

A taxa media de participantes diaria foi de 2.480 persoas, sendo a máxima taxa de participantes diaria de 4.136. O doutor Martinón detallou que as persoas que participaron na primeira fase do GalFlu presentaron taxas de ataque de infección por gripe máis baixas en comparación coa poboación non vacinada, sendo a positividad da gripe de 10,30% de media na cohorte de GalFlu, fronte a 14,6% en galegos de 65 a 79 anos non vacinados.

Esta menor taxa de ataque de gripe entre quen participa en GalFlu resalta non só o valor de participar no estudo senón, tamén, o impacto da vacinación contra a gripe a nivel de saúde pública, sinalou Martinón, quen remarcou que as vacinas da gripe salvan vidas.

Respecto da segunda fase, dixo que están convidados a participar 450.000 galegos de entre 65 e 79 anos, sendo o obxectivo do recrutamento entre 57.000 e até 70.000 persoas.