Soutomaior acollerá o próximo 20 de xuño a súa terceira edición da Gladiator Kids Race, a carreira de obstáculos deseñada especialmente para que os nenos e nenas de entre 3 e 11 anos practiquen deporte mentres viven "unha auténtica aventura".
O evento celebrarase no peirao de Arcade a partir das 16:30 horas. As prazas son limitadas e as inscricións, que xa está abertas, gratuítas.
O alcalde de Soutomaior, Manu Lourenzo, e o concelleiro de Deportes, Gonzalo Outeiro, presentaron este luns a proba, que ofrece 300 prazas para menores (sen contar aos adultos acompañantes).
Todos os participantes deberán ir acompañados por unha persoa adulta durante toda a proba.
Segundo o regulamento, a carreira dividirase en dúas categorías: unha de 500 metros para os nenos e nenas de entre 3 e 5 anos, e outra de 900 para os de 6 a 11 anos.
Só os nenos e nenas superarán os obstáculos, mentres os adultos acompañantes acompañaranos e apoiarán durante a proba, sen axudalos de maneira directa nos restos.
A proba desenvolverase por quendas, saíndo cada 5 minutos un grupo de até 15 participantes. Os horarios enviaranse a cada familia dous días antes do evento.
Durante a presentación do evento, Manu Lourenzo destacou que "desde o Concello de Soutomaior seguimos apostando por actividades deportivas pensadas para desfrutar en familia, fomentar hábitos saudables e promover valores como o compañeirismo, o esforzo e a diversión. A Gladiator Kids Race é xa unha cita moi especial para moitos nenos e nenas do noso concello e da contorna".
Pola súa banda, o concelleiro de Deportes, Gonzalo Outeiro, asegurou que "as e os pequenos que participen na Soutomaior Gladiator Kids Race volverán a desfrutar este ano dunha tarde incrible, nun espazo único como é o Peirao de Arcade e vivindo unha experiencia inesquecible ao tempo que fan deporte. Queremos animar a todas as familias a participar e vivir unha tarde diferente nun evento pensado para que os máis pequenos e pequenas sexan os verdadeiros protagonistas".
Engade Pontevedra Viva como fonte preferida de Google de balde
Mantente informado coas últimas noticias de actualidade.