A Xunta de Goberno Local do Concello de Pontevedra aprobou este xoves o convenio de colaboración coa Deputación Provincial que permitirá financiar parte da reforma integral da rúa Rosalía de Castro.
O proxecto, denominado "Mellora de accesibilidade na rúa Rosalía de Castro: Treito Manuel del Palacio-Ponte do Ferrocarril ao Porto de Marín", contará cun investimento global de máis de 2,4 millóns de euros.
Desa cantidade, a Deputación achegará 583.548 euros durante o exercicio de 2026, mentres que o Concello asumirá o resto, preto de 1,9 millóns de euros, con cargo ao orzamento municipal de 2027.
O alcalde de Pontevedra, Miguel Anxo Fernández Lores, destacou a importancia da colaboración institucional para sacar adiante a obra, aínda que aproveitou para reclamar unha maior implicación económica da Deputación.
Segundo indicou, a achega provincial forma parte dos 2,5 millóns reservados para Pontevedra en 2026, unha cifra que considera insuficiente.
"Seguiremos reivindicando máis fondos porque existe unha discriminación clara", insistiu o rexedor.
A actuación en Rosalía de Castro tramitarase ademais de maneira conxunta co futuro "bypass" que conectará a Avenida de Marín coa propia rúa, un proxecto paralelo valorado en máis de 1,2 millóns de euros e financiado integramente pola Deputación.
Fernández Lores explicou que a aprobación do convenio era imprescindible para habilitar a consignación económica e poder formalizar definitivamente o contrato coa empresa adxudicataria, E.C. Casas.
O calendario que manexa o goberno municipal sitúa a sinatura do contrato a comezos do mes de xullo, unha vez que o documento reciba tamén o visto e prace do pleno provincial.
A reforma de Rosalía de Castro está chamada a transformar por completo esta contorna urbana, cunha aposta por gañar espazo para os peóns e mellorar a conexión coa zona portuaria e coa Avenida de Marín.
Lores insistiu na importancia desta actuación considerada estratéxica para mellorar a accesibilidade, a seguridade e a mobilidade peonil nun dos accesos á cidade.
Subsolo dos edificios históricos do Museo
Nesta mesma Xunta de Goberno o Concello de Pontevedra aprobou a prórroga por catro anos do convenio coa Deputación para permitir a interconexión subterránea dos edificios centrais do Museo de Pontevedra.
O acordo, vixente agora ata maio de 2030, busca facilitar a obtención dos permisos necesarios e a execución das obras de consolidación, restauración e accesibilidade.
O alcalde agarda que este novo prazo sexa suficiente para iniciar unhas actuacións que aínda están pendentes da solicitude de licenza de obra.