A Xunta de Goberno do Concello de Pontevedra deu este xoves luz verde á súa intención de ampliar o convenio de colaboración coa Deputación de Pontevedra para permitir o uso do subsolo destinado á conexión entre os edificios centrais do Museo de Pontevedra.
A decisión chega despois de que o vicepresidente provincial, Rafael Domínguez, remitise unha comunicación oficial solicitando ao Concello que expresase formalmente a súa disposición a prolongar o acordo.
O convenio, rubricado en maio de 2022, contemplaba a cesión gratuíta do espazo subterráneo necesario para executar a conexión entre os inmobles museísticos.
Aquel acordo establecía unha vixencia ligada á duración das obras ou, como máximo, de catro anos, prazo que remata este mes sen que os traballos chegasen a iniciarse.
A tenente de alcalde e responsable municipal de Patrimonio, Eva Vilaverde, reiterou o apoio do goberno local ao proxecto impulsado pola institución provincial e asegurou que o Concello manterá a súa colaboración para facilitar a execución das actuacións previstas.
Segundo lembrou a edil, o Concello xa cumpriu cos compromisos asumidos no convenio inicial, entre eles a cesión do uso do subsolo e a modificación do PEPRICA para facer viable a intervención urbanística necesaria.
O acordo afecta a unha superficie máxima de 355 metros cadrados situados baixo as rúas Sarmiento, Pasantería e García Flórez.
Co obxectivo de formalizar a prórroga, o executivo municipal solicita agora á Deputación que presente "á maior brevidade posible" unha proposta de addenda que concrete os novos prazos previstos para o proxecto.
O goberno local quere adaptar a duración do convenio ao calendario real que manexa a institución provincial respecto ao inicio e finalización das obras.
Vilaverde incidiu en que o Concello precisa coñecer con detalle as previsións da Deputación antes de pechar a ampliación do acordo, especialmente no relativo aos tempos de execución da conexión subterránea entre os edificios do Museo.
Engade Pontevedra Viva como fonte preferida de Google de balde
Mantente informado coas últimas noticias de actualidade.