A Asemblea Provincial de Cruz Vermella Española en Pontevedra abre unha nova etapa co nomeamento de Gonzalo Iglesias Rial como presidente.
Esta substitución está marcada pola "continuidade, o compromiso e a mirada posta nos grandes desafíos sociais da provincia".
Iglesias, avogado vigués e figura moi vinculada á organización desde fai máis dunha década, toma o relevo de María Teresa Álvarez Quicler, quen deixa o cargo tras trece anos de intenso traballo.
Voluntario desde 2013 e membro do Comité Executivo Nacional desde 2023, Iglesias ocupaba até agora a vicepresidencia provincial.
Desde a Cruz Vermella destacan que a súa traxectoria interna e a súa defensa dos principios humanitarios convérteno nunha "elección natural" para liderar unha entidade que cada ano atende a máis de 26.700 persoas en situación de vulnerabilidade en toda a provincia.
O novo presidente recoñece que afronta esta responsabilidade "con ilusión, pero tamén con plena conciencia do que implica".
Apóiase nun equipo profesional sólido, un voluntariado de máis de 900 persoas e unha base social de 21.000 socios e empresas colaboradoras, unha rede humana imprescindible para manter vivos os proxectos que Cruz Vermella impulsa en Pontevedra.
A substitución chega tras un longo mandato de Álvarez Quicler, presidenta desde 2012, á que a institución agradece a súa dedicación.
Durante a súa xestión, Cruz Vermella afrontou retos profundos como o aumento da desigualdade, o risco de exclusión social ou a soidade non desexada, especialmente entre as persoas maiores.
O seu liderado deixou pegada en fitos tan relevantes como a apertura de novas sedes en Lalín, Redondela e Cangas, o fortalecemento dos equipos de resposta ante emerxencias ou o impulso do plan de emprego que pasou de ser un piloto a contar con oito proxectos activos e unha inserción superior ao 60%.
Cruz Vermella mantén na provincia unha ampla rede de atención distribuída en sete Asembleas Comarcais (Pontevedra, Vigo, O Salnés, Baixo Miño, O Condado, Deza e Tabeirós) e dous puntos adicionais en Redondela e Cangas.
Persoas maiores, infancia vulnerable, persoas sen fogar, mulleres en dificultade social, migrantes, solicitantes de protección internacional e persoas desempregadas forman parte do amplo abano de perfís asistidos.
Con esta substitución, a organización mira cara ao futuro consolidando a súa misión de ofrecer respostas integrais que aumenten as capacidades e autonomía das persoas, e seguir sendo un referente humanitario na provincia.
Iglesias Rial inicia así un novo capítulo no que a prioridade seguirá sendo estar ao carón de quen máis o necesitan.