A alcaldesa de Marín, María Ramallo, e a concelleira de Festas, Marián Sanmartín, presentaron este venres o cartel e a programación completa das Festas do Carme 2026, así como as actividades que haberá no municipio durante o verán.
O calendario festivo arrincará o 3 de xullo coa Mostra de Artesanía e a Concentración Moteira, que incluirá concertos, exhibicións e rutas nocturnas.
Entre os principais atractivos, a rexedora destacou a batalla de flores nocturna, prevista para o 9 de xullo, e a V Festa do Viño da IXP Ribeiras do Morrazo, que se celebrará na Alameda do 10 ao 12 de xullo.
O pregón mantense por agora en segredo .
A música volverá ser protagonista, coas actuacións de orquestras como Panorama (12 de xullo), Olympus (13), París de Noia (14), Marbella (15) e Los Player's, ou o concerto de Lérica no Parque Eguren.
O 16 de xullo, Día do Carme, celebrarase a tradicional procesión marítima e un espectáculo de fogos artificiais.
Unha das principais novidades desta edición é o cartel oficial, asinado polo ilustrador lucense Iván Mouronte e que integra o mar, os barcos, a música, as flores e a Virxe do Carme como figura central.
En paralelo, o Concello porá en marcha un plan especial de mobilidade para facilitar a asistencia aos eventos.
Ampliaranse os horarios de autobús entre Pontevedra e Marín entre o 10 e o 16 de xullo, con frecuencias nocturnas cada hora, e habilitaranse aparcadoiros públicos gratuítos, cuxa localización poderá consultarse neste enlace.
O programa completo das Festas do Carme pode consultarse na web do Concello de Marín.