O Partido Socialista de Poio acusou este xoves de falta de transparencia ao goberno municipal encabezado polo popular Ángel Moldes.
Asegura o PSOE por medio do seu portavoz Gregorio Agís que o equipo de goberno convoca comisións sen achegar a documentación dos expedientes para tratar. Debido a iso "estanse sometendo a votación expedientes sen cumprir co procedemento legal", afirma.
Para Agís "a falta de transparencia é total", cunha forma de proceder que asegura está a repetirse desde o inicio do mandato e coa que "o único que busca o Partido Popular é entorpecer e impedir o labor de fiscalización da oposición".
"Representamos a milleiros de veciños e veciñas, que son realmente aos que o alcalde lles está tratando cunha falta de respecto e de transparencia flagrante", quéixase o representante socialista.