HazteOír, unha asociación que asegura promover a participación política, a dignidade e os dereitos da persoa e da familia e o valor da vida, puxo o Concello de Pontevedra no seu punto de mira. Así o denunciou a concelleira de Benestar Social, Carmen Fouces, que desvelou que "colapsaron" o correo electrónico da alcaldía con máis de 230 mensaxes para esixir a retirada da Casa Consistorial da pancarta que reivindica o aborto libre e gratuito.
Na maioría dos casos, explicou Carmen Fouces, trátase de mensaxes automáticas que repiten o mesmo texto redactado previamente, pero recibíronse tamén correos electrónicos "personalizados" remitidos, na súa gran maioría, de persoas que non residen en Pontevedra. A concelleira citou expresamente o caso dun internauta de Córdoba que reclamaba que certas actuacións "no quiero pagarlas con mis impuestos".
Na petición que se pode asinar a través da súa páxina web, esta plataforma acusa ao goberno municipal de "abuso de poder en toda regra" e ao alcalde de Pontevedra, Miguel Anxo Fernández Lores, de "converter a casa de todos nun taboleiro de anuncios para adoutrinar á cidadanía con pancartas a favor do aborto". Esíxenlle polo tanto que "deixe de utilizar a sede consistorial con fins partidistas".
O maior prexuízo para o Concello é que pola chegada masiva destes correos "outros non entran", comunicacións que poden chegar a ser urxentes para os intereses municipais. Trátase, en todo caso, de peticións que chegan "dentro do ámbito da dereita", polo que a edil nacionalista asegurou que desde o goberno municipal "nos reafirmamos na nosa posición". Fouces insistiu que "non podemos deixar de defender os nosos dereitos".
"Persistiremos e seguiremos reclamando ou aborto libre e gratuíto porque ou que está sucedendo é un exemplo claro de que hai dereitos que están en perigo", sinalou a responsable de Benestar Social, quen reiterou que o aborto é un "dereito fundamental" que hai que defender porque "todo pende nun fío, nada está garantido e hai que seguir reclamando os nosos dereitos".