"Ilusión, curiosidade e ganas de velo": volve a Semana Santa en miniatura de Pontevedra

A Semana Santa de Pontevedra xa está aquí e con ela á exposición da súa versión en miniatura, elaborada polo pontevedrés Paco Luis López.

Desta 'Semana Santa en miniatura' forman parte numerosas figuras representando as diferentes confrarías e pasos da festividade na cidade. A mostra é froito dun longo proceso de creación e dedicación desde hai cinco anos.

O pontevedrés quixo levar os seus deseños máis aló das súas paredes, trasladándoos ao escaparate do comercio A Moda Dabaixo, situado na Rúa dos Soportais, 5, sendo este o segundo ano consecutivo de exhibición.

A instalación desta exposición durou sete horas, como comenta Paco Luís: "Empezamos onte á tarde, ás catro da tarde, e acabamos sobre as once da noite", afirmando a súa estadía até o final da Semana Santa.

Aínda que este ano non ampliou o número de confrarías, manténdose as sete agrupacións, si se incrementaron os pasos, como o de Flaxelación en proceso de finalización, o da Esperanza ou o da Virxe da Maior Dor, entre outros.

Como afirma Paco Luis, "a xente tamén o que ten que ver é que está feito por min, non comprado na rúa, entón estou a demostrar que os pasos aínda non están terminados". Así, declarou que todas as pezas son de elaboración propia, a excepción dos músicos.

Ademais, comenta que o proceso de elaboración é prolongado; inicialmente realízase a figura en terracota, deixándoa secar. Posteriormente, engádese un tapaporo para lograr firmeza na miniatura. En canto a cada detalle á hora de pintar, consegue nun 90% as cores exactas das confrarías.

Para deseñar estas pezas con exactitude, o creador inspírase nas súas vivencias, que é o que reflicte en cada unha das figuras. Lembra a súa traxectoria, participando na súa primeira procesión en 1962, establecendo entón unha relación coa Semana Santa que se estende até a actualidade.

Doutra banda, comentou que, ante a cantidade de persoas interesadas en comprar estes deseños, non están á venda. "Eu non poría nin prezo nin poría o valor que ten isto. Non vendo as figuras porque para min é unha colección privada".

Paco Luis contou que sempre participou nesta festa tradicional, xa sexa procesionando como fotografando as marchas, ou agora representando a estrutura dos pasos e as confrarías.

Rosa Díaz, propietaria da Moda Dabaixo, mostrou a súa satisfacción ante esta iniciativa, xa que considera que isto axuda a impulsar os pequenos comercios de Pontevedra. "Eu creo que vale a pena", indica observando como as persoas se paran a ver o escaparate e queren entrar.

Agradecendo a oportunidade que o negocio da Moda Dabaixo outorgoulle, o pontevedrés asegura que non cambiaría o lugar de exhibición das súas miniaturas. Cada ano amplía a súa colección, reducíndose o espazo dispoñible para engadir máis figuras.

Con todo, el considera que "o importante é que a xente coñeza e saiba que isto é a Semana Santa de Pontevedra, porque non hai por que ter devoción para ver isto, o que hai é que ter ilusión, curiosidade e ganas de velo".