O Concello de Cerdedo Cotobade saca a licitación os proxectos de rehabilitación das casas reitorais de Valongo e Quireza.
A actuación, presentada polo alcalde Jorge Cubela, suporá un investimento de 60.000 euros financiado integramente con fondos municipais.
Na presentación, celebrada diante dos propios inmobles, o rexedor estivo acompañado pola tenente de alcalde Lourdes Ovelleiro e pola concelleira Galiza Aguete.
Segundo explicaron, a contratación dividirase en dous lotes independentes e contará cun prazo de redacción de tres meses para definir as intervencións necesarias en cada edificio.
O proxecto enmárcase nun acordo que o goberno local está a pechar co Arcebispado de Santiago de Compostela, que permitiría a cesión das dúas reitorais por un período inicial de 25 anos, prorrogables.
O obxectivo é destinar estes inmobles, actualmente en desuso e con importante deterioro, a actividades veciñais, sociais, culturais, recreativas e museísticas.
As reitorais de Valongo e Quireza, consideradas exemplos salientables da arquitectura tradicional ligada aos conxuntos parroquiais, contan cun notable valor patrimonial.
A de Valongo tería a súa orixe a comezos do século XVII, mentres que a de Santo Tomé de Quireza data do século XVIII e destaca pola súa singular configuración arquitectónica.
O alcalde, Jorge Cubela, subliñou que o proxecto vai máis aló dunha simple rehabilitación. "Non queremos só recuperar dous edificios, senón crear novos espazos de encontro para a veciñanza e reforzar a actividade cultural nas parroquias", sinalou.
Neste sentido, o goberno local enmarca esta actuación dentro da súa estratexia de recuperación e valorización do patrimonio como motor de desenvolvemento local.
A intención é que as futuras intervencións convertan ambos inmobles en equipamentos públicos ao servizo da comunidade e na dinamización cultural do rural.
Unha vez redactados os proxectos, o Concello disporá dunha folla de ruta técnica que permitirá avanzar cara á rehabilitación integral das reitorais e á súa futura incorporación á vida social e cultural de Valongo e Quireza, contribuíndo á preservación da identidade histórica do municipio.
