O Concello de Pontevedra expresará o seu apoio ao recoñecemento de Indicación Xeográfica Protexida para os viños producidos nos municipios de Pontevedra, Bueu, Cangas, Marín, Moaña, Poio, Redondela e Vilaboa.
Este apoio cristalizarase no Pleno da corporación convocado para o mércores 19 de febreiro nunha moción que presenta o grupo do BNG que pretende prestar a colaboración do goberno local á Agrupación de Produtores para conseguir este obxectivo.
Os nacionalistas recollen unha petición da Federación de Furancheiros, Loureiros e Viticultores de Pontevedra para crear este recoñecemento de calidade para a produción vitivinícola destes municipios ao que se lles nega a súa inclusión na Denominación de Orixe Rías Baixas.
Ata agora estes viticultores só poden despachar o excedente da colleita mediante os furanchos malia que todas estas zonas contan cunha longa e documentada tradición de elaboración de viño.
No convencemento de que a aprobación da Indicación Xeográfica supoñerá un importante beneficio económico ao sector estes adegueiros iniciaron a tramitación ante a Unión Europea para conquerir este distintivo de calidade.