Ante a inminente reapertura da campaña de pesca de polbo, o Servizo de Gardacostas de Galicia, dependente da Consellería do Mar, despregou unha serie de controis contra o furtivismo nos últimos días de veda desta especie.
O resultado foi o comiso de 267 quilos de polbo e 561 aparellos antirregulamentarios en toda a comunidade.
Desas cifras, preto de 100 quilos correspóndense a intervencións na ría de Arousa.
En concreto nesta ría os axentes levantaron un total de 9 actas (6 de incautación e 3 de presunta infracción) froito do despregamento coordinado entre a Unidade Operativa (U.O.) de Vilaxoán e os Servizos Centrais.
O dispositivo máis destacado tivo lugar nas áreas de Defragueiras e Negreiriñas por parte do persoal de Vilaxoán, onde se tramitaron dúas actas de incautación que se saldaron co comiso de 51 cacharros e 48 quilos de polbo.
Ademais nas zonas de Taragoña e As Negreiras estendéronse tres actas de presunta infracción coa retirada de 28 nasas de butrón, 40 aparellos, 6 quilos de polbo e outros 6 quilos de choco, e na Mesa de Con (Illa de Arousa), localizouse e retirou unha cacea con 20 nasas sen identificar que mantiñan no seu interior 7 quilos de polbo e 2 quilos de nécora.
Pola súa banda, a Unidade de Servizos Centrais interveu nas zonas intermareales e de canle de Pedregoso e Pedra da Loba, localizando aparellos sen balizar nin identificar. Esta operación saldouse coa incautación de 12 nasas de polbo, 60 nasas de camarón e 25,1 quilos de polbo.
Por último nun control perimetral en Pedras Negras, no Grove, os gardacostas retiraron unha cacea con 20 cacharros e outros 7,4 quilos de captura. Ao non poder identificarse aos infractores e comprobar que o marisco estaba vivo, procedeuse á súa liberación inmediata no medio mariño.
Estas actuacións preventivo despregáronse ante a inminente reapertura da campaña do polbo, o vindeiro mércores 1 de xullo, data na que expira o período de dous meses de veda obrigatoria destinado a protexer a reprodución e o crecemento da especie.