Un incendio destruíu por completo unha nave dedicada á carpintaría naval no lugar das Bizocas, no Grove.
O incidente orixinouse preto da unha da madrugada deste mércores e as lapas puideron observarse desde diferentes puntos da parroquia de San Vicente do Mar, segundo os datos facilitados polo servizo de emerxencias do 112 Galicia.
Tras recibir varias chamadas de alerta de particulares, o centro de atención ás emerxencias mobilizou aos Bombeiros do Salnés e aos membros do Servizo Municipal de Protección Civil do Grove.
Debido a que nos primeiros momentos se descoñecía a orixe exacta do lume e ante o risco de que se estendese á contorna natural, tamén se incorporou ao operativo persoal do distrito forestal da zona.
Os equipos de intervención comprobaron ao chegar ao lugar que o foco principal se concentraba no interior da instalación industrial, onde se acumulaban diversos materiais destinados á fabricación de embarcacións de fibra.
A combustión destes compoñentes provocou a destrución total da estrutura.
Os traballos de extinción evitaron que o lume se propagase cara fóra do recinto.
Segundo explicaron os bombeiros do parque de Ribadumia, a instalación lindeira sufriu danos leves debido unicamente á acumulación de fume, sen que se rexistrasen danos na poboación nin afectación no monte próximo.