Repunte de casos positivos por coronavirus na comarca nas últimas 24 horas, aínda que iso non se traduciu nunha maior presión hospitalaria ao diminuír o número de ingresados en Pontevedra e O Salnés por esta causa.
Segundo os datos oficiais ofrecidos este xoves 23 de abril pola Consellería de Sanidade, a área sanitaria rexistra 535 casos activos de Covid-19, o que supón 15 máis que o mércores. Con todo as hospitalizacións descenderon a 30 persoas, 3 menos, con pacientes atendidos nos servizos de planta de Montecelo, O Salnés (1) e QuirónSalud Miguel Domínguez.
A cifra de hospitalizados complétase cos 5 afectados de coronavirus que evolucionan na Unidade de Coidados Intensivos (UCI), unha menos que o día anterior. O resto de 505 casos positivos atópanse nos seus domicilios.
Desde o inicio da alerta sanitaria faleceron na área sanitaria 15 persoas, a última este mércores, un home de 68 anos que estaba ingresado en Montecelo.
En canto ás recuperacións, as altas hospitalarias ascenden a 153 tras un incremento de 4 no balance oficial deste 23 de abril.
A nivel autonómico a Dirección Xeral de Saúde Pública da Consellería de Sanidade informa que, na última actualización, o número de casos activos de coronavirus en Galicia ascende a 6.637, dos que 1.550 son da área da Coruña, 627 da de Lugo, 1.301 da de Ourense, 1.164 da área de Vigo, 1.078 da de Santiago, e 382 da de Ferrol.
Do total de pacientes positivos, 92 permanecen en UCI, 568 están en unidades de hospitalización e 5.977 no domicilio. Polo de agora, en Galicia rexistráronse 1.676 altas de pacientes e 492 falecementos.
O número de PCR realizadas é de 76.129 e o número de casos de coronavirus detectados en centros residenciais de servizos sociais supoñen o 3,7% do total das persoas residentes. En total, contabilízanse 900 positivos en usuarios e 360 en profesionais. Faleceron 116 persoas en residencias e 110 en hospitais e residencias integradas.
A Consellería de Sanidade reitera que a cidadanía empregue o número 061 só para emerxencias ou casos graves e aconsella utilizar o número gratuíto do 900 400 116 para consultar dúbidas ou síntomas leves de coronavirus.
O Sergas ten ao dispor da cidadanía unha páxina web (https://coronavirus.sergas.es), na que se pode consultar información dirixida á poboación, aos profesionais sanitarios e a outros colectivos.