Todas as actuacións que se están a desenvolver no ámbito Santa Clara, incluídas as relativas aos xardíns, están recollidas no proxecto de rehabilitación e ampliación do recinto conventual autorizado por Patrimonio en xullo de 2024.
Así o acredita un informe da Consellería de Cultura, Lingua e Xuventude da Xunta de Galicia, que garante que estas intervencións teñen "respaldo legal e técnico".
Desde o goberno provincial subliñan que este documento sinala "claramente" que avala a xestión da vexetación -incluída a retirada de exemplares afectados-, o traslado do antigo cemiterio ou a adaptación de elementos como o pozo.
Deberán executarse, iso sí, baixo control arqueolóxico e coas cautelas propias dun ben catalogado como é o propio convento.
Deste xeito, insisten desde a Deputación, o informe "desminte as críticas" realizadas por parte do PSOE, que falou de "deforestación" de Santa Clara e de falta de autorizacións.
"A realidade é que todas as actuacións responden a criterios técnicos e ás obrigas legais vinculadas á intervención arqueolóxica e á protección do patrimonio", sosteñen.
O vicepresidente Rafa Domínguez, responsable político deste proxecto, explicou que en Santa Clara "non se está improvisando nin tomando decisións arbitrarias", senón que se busca que o proxecto se execute "con todas as garantías".
A este respecto, a Deputación afirma que o proxecto de rehabilitación se sitúa nunha "fase avanzada" e encamiñada cara ao inicio das obras, unha vez completados todos os requisitos técnicos e administrativos.
Santa Clara, engade Domínguez, está sometida a un procedemento "complexo", no que é obrigatorio realizar escavacións, estudos e posibles adaptacións do propio proxecto en función dos achados arqueolóxicos que aparezan.
Engade Pontevedra Viva como fonte preferida de Google de balde
Mantente informado coas últimas noticias de actualidade.