Un veciño de Pontevedra ingresou este venres en prisión tras ser detido un día antes por incumprir a orde de afastamento que lle prohibía achegarse á súa filla.
Esa orde de afastamento tíñaa en vigor a moza como vítima dun delito de agresión sexual polo que o pai acabou condenado a 12 anos de prisión. Cando ocorreron eses feitos, ela era menor de idade.
A pesar da existencia dunha sentenza condenatoria, esta aínda non se executara, de modo que o home seguía en liberdade á espera de ingresar en prisión.
Este xoves, a moza viu ao seu pai nas inmediacións de onde ela estaba e alertou á Policía Nacional. Fontes oficiais confirmaron que axentes da Unidade de Atención á Familia e Muller (UFAM) da Policía procederon á súa detención.
A detención, avanzada por Radio Pontevedra, rexistrouse ao mediodía deste xoves 13 de febreiro na rúa Gorgullón. Un vehículo camuflado da Policía Nacional detivo o home por un delito de quebrantamento e trasladouno á Comisaría.
Este venres, durante a mañá, o home foi posto a disposición do Xulgado de Garda de Pontevedra e estas mesmas fontes confirmaron que se acordou o seu ingreso en prisión.
O home foi detido, nesta ocasión, por incumprir a orde de afastamento que lle impide achegarse á súa filla e vítima, pero á hora de ordenar o seu ingreso en prisión tívose en conta a súa condena por agresión sexual.
O home foi condenado primeiro pola Audiencia Provincial de Pontevedra e logo a pena foi confirmada polo Tribunal Superior de Xustiza de Galicia (TSXG).