A Policía Nacional detivo un vello coñecido das Forzas e Corpos de Seguridade que, tras pasar 11 anos no cárcere e acumular máis de 30 antecedentes, volveu delinquir en Pontevedra.
O home, veciño de Pontevedra, pero de orixe portuguesa, volveu ingresar en prisión por orde xudicial tras supostamente cometer un roubo con violencia e intimidación e un delito de furto de vehículo en apenas oito días.
No momento da súa detención, ademais, os axentes atoparon escondido na manga da súa cazadora un coitelo de 40 centímetros, 30 deles de folla.
O primeiro delito que lle atribúen rexistrouse o 10 de outubro. Unha muller de máis de 90 anos chamou á Policía Nacional denunciando que fora vítima dun roubo con intimidación.
Segundo relatou, cando se dispuña a entrar no portal do seu domicilio, foi abordada por un home que lle agarrou as mans e ameazouna cunha navalla para que lle entregase as xoias de ouro que portaba.
Tras levar os seus anillos, pendentes e un broche saíu fuxindo subido nun patinete. Tamén lle levou diñeiro en efectivo.
Por mor da denuncia, os axentes iniciaron as investigacións para pescudar a identidade do presunto autor e pescudaron que vendera as xoias nun local de compravenda da cidade.
As xoias, finalmente, puideron ser recuperadas para entregarllas á súa lexítima propietaria.
O segundo delito foi cometido o 18 de outubro. Un axente fóra de servizo observou a este individuo camiñando pola rúa, viu como accedía a un parking do centro e saía a bordo dun vehículo que fora subtraído na rúa Samil de Vigo.
Segundo a información policial facilitada, no interior do coche portaba tamén obxectos roubados, entre eles un teléfono móbil e un reloxo intelixente ademais de roupa deportiva valorada en 400 euros..
Finalmente, foi detido o día 22 de outubro nas inmediacións do Paseo de Colón subido a un patinete.
Ao detectar a presenza policial, saíu fuxindo e foi finalmente interceptado polos axentes, producíndose un forcexeo durante o que os axentes localizaron na manga da cazadora do detido o citado coitelo 'xamoneiro'.
Era coñecido en Pontevedra anos atrás, aínda que hai tempo que non estaba na cidade. Pasara 11 anos en prision, entre 2013 e 2024, tras unha rechamante detención en outubro de 2013.
A Policía Nacional detívolle tras protagonizar unha espectacular persecución e fuxida polas rúas da cidade primeiro nun Volkswagen Touareg roubado o día anterior en Vigo e logo a pé. Conseguiu eludir o cerco policial durante preto de 23 horas e foi localizado nas inmediacións do centro sanitario da Mercé.