O Concello de Caldas comezou esta semana as obras de restauración da Carballeira e do Xardín Botánico, cunha duración prevista de cinco meses.
O tenente de alcalde, Manuel Fariña, supervisou xunto co director do proxecto, Pedro Calaza, decano do Colexio de Enxeñería Agrónoma de Galicia, e técnicos da empresa ‘Xestión Ambiental de Contratas’, a coordinación dos traballos.
No arranque do proxecto, os primeiros labores céntranse na retirada de especies invasoras e de vexetación en mal estado ou degradada.
Ademais, realizarase o transplante de árbores que estean en bo estado a outras zonas do concello, especialmente aqueles exemplares de especies autóctonas que interesa conservar.
Nunha segunda fase, retirarase o mobiliario urbano en mal estado, levantarase a cartelería, desmontarase o cableado e as instalacións eléctricas, así como as casetas de madeira e o escenario.
Prevese tamén a demolición de pavimentos deteriorados e o arranxo xeral de muros, chanzos e bordos.
Posteriormente, instalaranse novos puntos de luz, bocas de rego, reacondicionaranse os camiños e pavimentarase a Ruta dos Muíños cun deseño de pedras de muíño de granito.
Finalmente, levaranse a cabo as actuacións de xardinería, como a extensión de terra vexetal e a plantación de novos exemplares para reconstruír bosquetes densos e laxos, recuperando o aspecto natural da zona.
Segundo Manuel Fariña, agárdase que a restauración da Carballeira e do Xardín Botánico remate a comezos da primavera.
O proxecto, bautizado como ‘Xardín Botánico e Carballeira de Caldas de Reis. Museo Aberto 24/7’, conta cun financiamento de 1,4 millóns de euros procedentes dos fondos Next da Unión Europea.
CRÍTICAS DA OPOSICIÓN
O PP de Caldas considera "totalmente insuficiente" a restauración prevista da Carballeira e considera que se dilapidan 640.000 euros en "actuacións superfluas".
Os populares acusan o goberno local da "mala xestión e abandono" destes espazos durante anos.
Fernando Pérez, representante da agrupación popular, afirma que a obra vai comezar "cando xa tiña que estar rematada" lamentando o atraso da intervención.