A Policía Nacional de Pontevedra recibiu durante o mes de xaneiro tres denuncias por roubos con forza nas parroquias de Marcón e Tomeza.
Os investigadores traballan sobre a hipótese de que os responsables son os integrantes dunha banda de ladróns itinerante que agora se asentou nesta zona.
Son, segundo as primeiras investigacións, profesionais que previamente realizan vixilancia sobre os seus obxectivos e logo actúan con rapidez.
En todos os casos, os ladróns actuaron en vivendas que, nese momento, estaban baleiras.
Actuaron en distintas franxas horarias do día, tanto pola mañá como a última hora da tarde, pero sempre esperando a que non houbese ninguén na casa.
Para entrar, romperon unha xanela da planta baixa e, unha vez no interior, o seu obxectivo foi lograr un botín de diñeiro e xoias.
Fontes oficiais confirmaron que os roubos que hai denunciados son dous en casas de Marcón e un en Tomeza, aínda que non se descarta que se producira algún máis e as vítimas non acudisen a formalizar a denuncia.
A existencia destes roubos causou gran preocupación entre a poboación das parroquias afectadas, que están a chamar a extremar as precaucións nas vviendas.