O presidente da Deputación de Pontevedra, Luis López, anunciou a mobilización de preto de 5 millóns de euros desde a Xunta de Goberno para actuacións estratéxicas nos eidos da eficiencia enerxética, benestar social, cultura, deporte e investimentos municipais en máis de 30 concellos da provincia.
“É un compromiso firme cos concellos e coa cidadanía”, afirmou.
Na área cultural, a Deputación aprobou as bases da segunda edición do programa Rías Baixas Acción, destinado ao patrocinio de producións audiovisuais.
Este ano medra un 61 % ata os 170.000 euros, con dúas liñas diferenciadas: 100.000 euros para curtametraxes, longametraxes e series, e 70.000 para documentais e podcasts.
As axudas oscilarán entre 3.000 e 25.000 euros, cun prazo de solicitude aberto ata o 30 de agosto.
“Somos a casa amiga do audiovisual. É un sector estratéxico, motor cultural, turístico e económico da provincia”, subliñou López.
No eido social, tamén se anunciou a nova edición do programa Provincia +Inclusiva, que aumenta o seu orzamento ata os 210.000 euros.
Esta iniciativa, dirixida a entidades sen ánimo de lucro, permite financiar actuacións para mellorar a accesibilidade, incluíndo desde proxectos arquitectónicos ata a adquisición de axudas técnicas como camas articuladas ou sistemas de comunicación inclusivos.
Como novidade, amplíase a todas as entidades con sede na provincia, fronte á limitación do pasado ano aos municipios de menos de 50.000 habitantes.
O deporte volve situarse como eixo estratéxico do goberno provincial con novos investimentos. A Deputación destinará 405.000 euros, un 50 % máis que no ano anterior, a apoiar deportistas de alto nivel, talentos emerxentes e persoas con discapacidade, así como adestradores e árbitros, que dispoñan de recoñecemento oficial.
As contías varían entre os 500 e os 3.000 euros segundo a categoría e méritos acadados en competicións nacionais e internacionais. “Esta é a provincia do deporte, e ninguén quedará sen apoio”, afirmou o presidente.
No ámbito das infraestruturas viarias, destaca o investimento de preto dun millón de euros para melloras en Mos e Cerdedo-Cotobade. En Cerdedo-Cotobade, investirase na mellora da iluminación da estrada EP-0405 entre A Xesteira e Almofrei, con 260.000 euros cofinanciados entre Deputación e Concello.
CONVENIOS CO CONCELLO DE PONTEVEDRA
Luis López informou sobre dous convenios co Concello de Pontevedra sinalando que amosan a lealdade institucional e o apoio á capital da provincia.
Un deles, con 210.000 euros de investimento, permitirá a mellora do sistema de xestión dixital do Concello de Pontevedra, con especial atención á seguridade da información, interoperabilidade entre administracións, mellora de infraestruturas tecnolóxicas e axilidade nos procesos administrativos.
O proxecto contempla melloras nos sistemas de seguridade da información para garantir a protección dos datos da cidadanía, reforzo das redes e servidores para soportar a carga das tramitacións electrónicas e o desenvolvemento de ferramentas que faciliten a tramitación telemática.
Por outra banda, tamén se destinarán 143.000 euros para a renovación do céspede nos dous campos de fútbol do centro deportivo Manolo Barreiro na Xunqueira.
Este segundo convenio ten como obxectivo a mellora das instalacións deportivas municipais, con retirada do céspede actual, xa deteriorado polo uso intensivo e instalación dun novo céspede artificial de última xeración, con maior resistencia e mellores prestacións.
A través do Plan +Provincia 2025, a Deputación aprobou nesta Xunta de Goberno preto de 2,5 millóns de euros para investimentos e gasto corrente en 36 concellos. Destacan actuacións como o novo parque Urbano Lugrís en Bueu, con 900.000 euros financiados integramente pola Deputación.
“Estamos a demostrar que a Deputación é un motor de transformación real para os nosos concellos, un exemplo de xestión útil, próxima e eficaz”, concluíu Luis López.