O Xulgado de Primeira Instancia e Instrución número 2 de Vilagarcía de Arousa deixou en liberdade con cargos a tres veciños de Vilanova de Arousa detidos como presuntos autores dun suposto delito de tráfico de drogas e outro por pertenza a grupo criminal.
Trátase dunha operación conxunta da Garda Civil e a Policía Nacional denominada "Cipro II".
Segundo informaron fontes oficiais do Instituto Armado, as tres persoas detidas teñen antecedentes por este tipo de delitos.
Pola súa banda, desde a Policía Nacional explicaron que a operación se despregou na mañá do xoves 22 de maio.
Ademais das detencións, os axentes realizaron varios rexistros en Vilanova de Arousa, nun deles interviñéronse diversas sustancias estupefacientes.
Destacan 173 gramos de cocaína, 5 landras de haxix, 6 plantas de marihuana, 4 caixas con cogollos, unha envasadora ao baleiro, dúas básculas de precisión, así como terminais móbiles, equipos informáticos, un vehículo e 1.000 euros en efectivo.
Tanto a Garda Civil como a Policía Nacional sinalan que continúan as investigacións, non descartando máis detencións.
Nesta operación interviñeron o Equipo de delincuencia organizada e antidroga (EDOA) da Unidade Orgánica de Policía Xudicial da Garda Civil de Pontevedra, en coordinación co Grupo II da Unidade de Drogas e Crime Organizado (UDYCO) da Comisaría de Pontevedra e o Area de Investigación da Garda Civil de Cambados.