En apenas dous días e medio, os técnicos municipais de urbanismo deron a súa aprobación á licenza solicitada pola Deputación de Pontevedra para realizar unha segunda fase de escavacións no ámbito do convento de Santa Clara.
Trátase dunha intervención arqueolóxica previa á execución do proxecto de rehabilitación integral do antigo cenobio, que ultiman os arquitectos que gañaron o concurso público, o estudo madrileño Nieto Sobejano.
O Concello decretara que a tramitación fora prioritaria e este xoves o alcalde de Pontevedra, Miguel Anxo Fernández Lores, indicou que xa foi aprobada.
"Tras dous anos e medio de espera por esta solicitude, tramitamos a licenza en dous días e medio", destacou Fernández Lores tras a reunión semanal do seu goberno.
Estes traballos teñen un prazo de execución de cinco meses.
A actuación, que realizará a empresa Citania Arqueoloxía, consistirá na realización dunha serie de sondaxes e de lectura dos paramentos, dando continuidade aos realizados en 2022, para avaliar histórica e arqueolóxicamente o estado do convento.
A licenza de concede con diversas condicións que se deberán cumprir durante o desenvolvemento destes traballos, entre eles que se axuste á autorización concedida por Patrimonio da Xunta e seguir todo tipo de cautelas arqueolóxicas.
Ademais, haberá que garantir un perímetro de seguridade con respecto ás árbores protexidas nos xardíns do convento e toda escavación deberá limitarse á recollida na documentación técnica presentada.
Os técnicos lembran tamén que o desmantelamento do pozo, que será trasladado a outro punto do complexo, e do antigo cemiterio non están incluídos nesta intervención, polo que haberá que garantir a súa estabilidade durante esta intervención arqueolóxica.