Abel Losada rexeita desde A Lama "a ambigüidade e o silencio cómplice" ante a "terrible prisión a ceo aberto" de Gaza

O xenocidio en Gaza marca a actualidade política en todas as institucións e este mércores achegouse tamén á conmemoración do Día da Mercé, patroa dos corpos de Institucións Penais, na prisión da Lama.

O subdelegado do Goberno en Pontevedra, Abel Losada, contrapuxo a situación das prisións españolas, "un referente internacional en lexislación e xestión penal" nun país "extraordinariamente moderno, desenvolvido e no que se pode levar unha vida en paz" fronte ao que está a vivirse Gaza.

Nun mundo onde "a democracia coxea cada vez máis" e a paz e os dereitos humanos máis básicos "brilla coa súa ausencia en determinados lugares", contrapón a realidade española coa que se vive noutras partes do planeta, con "prisións clandestinas, prisións privatizadas, prisións para inmigrantes en países terceiros".

E detívose en Gaza, onde "estamos a ver tamén unha terrible prisión a ceo aberto na que se bombardean nenos, mulleres, enfermos encamados e a todo ser vivente".

"Hai neste mundo noso unha prisión en forma de franxa na que algúns líderes poderosos soñan con construír un resort turístico", insistiu e tachou a situación de "absolutamente inmoral".

Como subdelegado, quixo rexeitar, "a morneza, a ambigüidade, a equidistancia e o silencio cómplice".

Logrou un gran aplauso do público ao afirmar que "os dereitos humanos non se negocian e deben de respectarse sempre en todas partes; en Estocolmo, en Madrid, en Torre Pacheco e en Gaza".

Nun acto no que tamén estiveron presentes o alcalde de Pontevedra, Miguel Anxo Fernández Lores, e a tenente de alcalde, Eva Vilaverde, cun pin e un colgante de apoio a Palestina, Losada destacou que, para evitar situacións como as que se viven en Gaza é "tan importante" o traballo dos funcionarios e funcionarias da prisión "porque entre estes muros hai persoas e todas e todos somos persoas, os que vimos de visita, os que aquí traballades e os que aquí cumpren condena ou prisión preventiva".

O centro penal da Lama é, para Losada "un referente", que foi deseñado para cumprir cos "modernos estándares de reeducación e reinserción".

Os cárceres do pasado, "centrados no castigo", destaca Losada, "falan hoxe de reinserción social" e "así se respira" en cada un dos módulos e celas do centro da Lama.