Case seis anos despois o cruceiro de Couso, en Santa María de Xeve, xa está de volta no seu sitio. A súa cruz caera en 2019 durante uns traballos de roza. Os seus anacos foron custodiados pola veciñanza do lugar ata que, por fin, o conxunto puido ser restaurado e recuperado.
O motivo deste accidente foi un toque accidental na base do cruceiro, situado na marxe da estrada PO-223, que viu a súa cruz caer ao chan e sufrir danos que o alteraron gravemente. Permaneceron in situ o seu varal e o seu capitel.
O Concello contratou unha empresa especializada en restauracións, BIC Materiales y Conservación, para recuperar o cruceiro e devolverlle o seu esplendor.
A unidade municipal de arqueoloxía explica que a cruz latina do cruceiro ten no anverso a figura de Cristo, case exento, e no reverso a Piedade.
O estado de conservación previo á restauración era moi deficiente, con algunha restauración anterior non especializada e con certa perda de material. A base da cruz permanecía inserida no capitel e foi retirada para a súa restauración en taller.
Así, os criterios seguidos na restauración foron os habituais neste tipo de traballos, destacando a preservación de todo elemento orixinal presente, o emprego de materiais reversibles, a mínima intervención posible ou a identificación de engadidos.
As fases de restauración que precederon á montaxe de toda a estrutura foron a limpeza, tanto de sucidade como de pátina biolóxica, a adhesión das pezas rotas ou a reintegración material das perdas e das xuntas entre fragmentos.
Todos estes traballos foron precedidos da roza de vexetación da contorna máis inmediata ao cruceiro e da estabilización do varal.