Como ocorre sempre en convocatorias destas características, as axudas municipais aos autónomos e microempresas que se viron obrigados a pechar temporalmente pola covid-19, coñecidas como Supera20, recibiron unha avalancha de peticións nos últimos días.
Ao peche do prazo, que expiraba o pasado mércores, presentáronse 236 solicitudes. A edil de Réxime Interior, Anabel Gulías, explicou que tras un "cribado provisional" os técnicos municipais consideran que algo máis de duascentas cumpren cos requisitos.
"O obxectivo está cumprido", destacou Gulías, que considera que estas axudas Supera20 foron "feitas a medida" das necesidades dos emprendedores e son unha "ferramenta verdadeiramente útil" para axudar aos sectores máis afectados pola pandemia.
A partir de agora, queda por diante un "traballo arduo" para requirir toda a documentación aos solicitantes das axudas que, de maneira maioritaria, pediron un adianto dos fondos que lles corresponderían, ata un máximo duns 4.000 euros.
Para iso, a oficina técnica de Supera20 seguirá aberta para atender aos beneficiarios destas axudas. Farao de forma presencial entre as 9:30 e as 13:30 ou ben por teléfono.
Entre os autónomos e microempresas que se adheriron a esta liña de axudas, sinalou a edil do BNG, "hai de todo", pero case todos buscan financiar obras que se viron obrigados a facer nos primeiros meses de apertura tras o estado de alarma.
A intención do goberno municipal é que, polo menos os anticipos solicitados polos emprendedores, poidan cobrarse antes de final de ano
Establecementos hostaleiros, comercios téxtiles, academias ou salóns de peiteado e centros de estética son algunhas das actividades que predominan entre os solicitantes, que poderán recibir ata 5.000 euros por cada proxecto presentado.
O Concello estima que "andaremos moi preto" de esgotar a partida de 1.250.000 euros reservada para estas axudas, pero avanza que no caso de que sobre diñeiro estudarase realizar unha nova convocatoria ou ben destinalo a outro tipo de axudas pola covid-19.
A intención do goberno municipal é que, polo menos os anticipos solicitados polos emprendedores, poidan cobrarse antes de final de ano.
Anabel Gulías recoñeceu que o Concello está "moderadamente satisfeito" co resultado destas axudas Supera20 que, segundo lembrou, impulsáronse para "mover a economía local" e inxectar liquidez no comercio local.