"Máis dereitos e menos trincheiras" reclama UXT no 1 de maio dun momento "decisivo"

UXT volveu a saír en solitario ás rúas de Pontevedra durante este 1 de maio. Decenas de persoas secundaron a súa manifestación, reclamando "máis dereitos e menos trincheiras".

A marcha partiu á unha da tarde da Praza da Ferrería e percorreu as rúas máis céntricas de Pontevedra até chegar á Praza de España.

Os seus participantes alertaron de que o país se enfronta a un momento "decisivo", ao entender que "están en xogo" as condicións de vida da clase traballadora "e a propia democracia".

"Fronte a quen pretende dividirnos, enfrontarnos e levantar trincheiras, respondemos con máis dereitos, máis cohesión social e máis democracia", sinalaron desde UXT.

Tras reivindicar o fin das guerras activas, o sindicato advertiu de que o avance da ultradereita en España "alimenta o odio e debilita a democracia" ao cuestionar dereitos "fundamentais" dos cidadáns.

Quixeron aproveitar este 1 de maio, entre outras cuestións, para apoiar o proceso de regularización de persoas migrantes ou reclamar que a vivenda non pode ser un ben especulativo, esixindo unha intervención pública "decidida".

Ademais, os portavoces de UXT defenderon que o diálogo social permitiu mellorar o emprego, reducir a temporalidade e subir salarios, aínda que recoñeceron que os avances alcanzados "non son suficientes".

Aínda existen, sinalaron, "millóns de persoas que ven como a súa situación económica non lles permite cubrir as súas necesidades básicas con suficiencia".

Despois de lembrar que dereitos "non se regalan" senón que "se conquistan", apelaron á necesaria unidade do sindicalismo "fronte ao ruído, ao odio e á división" para que a clase traballadora poida seguir avanzando en dereitos.