Nas próximas semanas iniciaranse e contrataranse no Concello de Marín varias actuacións urbanas que xa están preparadas para levalas a cabo e que no seu conxunto suman máis dun millón de euros en investimentos, financiados pola Deputacion, a Xunta e o Concello.
Son a pavimentación da rúa Recamán, a humanización da rúa Concepción Arenal no tramo de Jaime Janer a Roda, a humanización da travesía de Jaime Janer, a finalización de Ponte Zapal e a humanización da rúa José del Río.
Algunhas destas actuacións xa están adxudicadas, outras están próximas a adxudicarse, outras en marcha e outras no inicio da contratación.
Todas teñen en común que levan o cambio dos servizos e redes públicas, que conectan moitas vivendas.
Desde o goberno local de Marín destacan que as recentes reformas no casco antigo e nas rúas máis céntricas "melloran considerablemente a calidade urbana dos que viven e frecuentan estas contornas".
Estas cinco actuacións serán executadas neste último semestre do ano, dentro do ano 2017.