Marea Pontevedra presentou esta semana unha proposta, que será debatida no pleno deste luns 21 de novembro, para evitar o dragado do río Lérez.
Entenden que dragar é "caro, inútil e contraproducente" xa que implica gravísimos danos para o ecosistema. Entre outras razóns, argumentan que "o río non só é a auga que se observa. Se o que se quere é limpar o río, as enchentes son as que limpan".
Para Marea Pontevedra "o imprescindible é recuperar a natureza do río e non ir contra a natureza para satisfacer os intereses dunha minoría usuaria do Porto deportivo".
Neste senso engaden que "se existen construcións de dubidosa legalidade ou de impacto ambiental grave o que cómpre é desmantelalas".
Segundo Marea Pontevedra a propia lexislación europea ten moi limitados os dragados por ser unha práctica "insostible económica e ecoloxicamente".
"O río ten vida propia e non queda máis remedio que entender as súas dinámicas. Non se trata de adaptar o río e de canalizalo; algo, polo demais, imposible. O río seguirá sedimentando onde teña que facelo ou onde lle sexa posible. Isto é o perigoso a medio e longo prazo", din dende Marea.
Esta formación política recorda que o concello de Pontevedra ten 5 quilómetros de fachada marítima "e nos últimos 17 anos non se gañou un só metro na recuperación do litoral, senón que seguiu agravándose a situación".
Marea Pontevedra di ter localizadas ata sete "agresións graves" na desembocadura do río Lérez, e citan o enlace da autoestrada AP-9, o edificio da Garda Civil, o porto deportivo, as naves da administración provincial na Xunqueira do Alba, a gasolineira e edificios da ponte do Burgo, verteduras directas entre a ponte de Santiago e a ponte dos Tirantes e as cocheiras do Ministerio de Fomento.
A esta lista engaden outras sete "agresións" máis no fondo da ría: a autovía a Marín, as cocheiras de Monbus, o macronudo-rotonda da AP-9, o complexo Ence-Elnosa, a liña ferroviaria, os recheos do porto, e a xunqueira de Gandarela.