De record. Así foi a sétima edición da marcha solidaria contra o cancro organizada este domingo pola Asociación Española Contra o Cancro en Pontevedra.
Unhas 2.700 persoas participaron nesta ruta, un evento crave para a visibilización, o apoio a pacientes e a recadación de fondos para servizos gratuítos e investigación oncolóxica.
"Grazas por estar aquí, por camiñar connosco un ano máis. Esta marcha xa forma parte do corazón de Pontevedra e demostra que, cando a sociedade se une, é posible avanzar na loita contra o cancro", destacou a presidenta da AECC na cidade, Ana García.
Un dos momentos máis emotivos da mañá foi a lectura do manifesto a cargo de Mónica Fiestras, paciente oncolóxica, quen compartiu a súa experiencia persoal, pondo no centro a quen representan o sentido desta marcha: os pacientes de cancro e as súas familias.
Explicou que, de desde o momento en que recibiu o seu diagnóstico, "o meu mundo cambiou" e nela apareceron "medos, dúbidas e incerteza" pero tamén "o apoio de persoas que camiñan á beira de quen atravesamos esta dura etapa"
Aos asistentes a esta marcha díxolles que "con cada paso que dades hoxe, cada inscrición ou cada pequeno xesto non só estades a axudar a visibilizar historias como a miña, senón tamén impulsando a investigación e apoiando a prevención".
"Grazas por axudar a que ninguén teña que enfrontarse ao cancro en soidade. Hoxe, xuntas e xuntos, somos máis fortes", subliñou.
A xornada comezou ás 10:30 horas na Praza de España, lugar de saída e chegada da marcha cun quecemento dirixido polo gimnasio Be One, acompañada polos ritmos enérxicos da batucada Vikingos, que marcaron o ton positivo da mañá.
Esta edición da marcha repetiu percorrido de 5,2 quilómetros que bordeou o río Lérez, atravesando a ponte do Burgo e regresando ao centro histórico da cidade. A proba foi non competitiva e houbo participantes de todas as idades, familias completas, mascotas, pacientes e grupos.
Xabier Cuñarro foi o participante máis novo, con só 2 meses de idade, mentres que a máis veterana foi María Sara González, de 92 anos. O grupo organizado por Avigal foi recoñecido, pola súa banda, como o colectivo máis numeroso.
Unha exhibición de zumba a cargo de Bruno Hermida completou unha xornada que contou ademais as tropas da Lexión 501 (Star Wars), Batucada Os Vikingos, pintacaras infantís con Ludiland, o divertido photocall 360º Eventualive e unha carpa divulgativa da asociación.
