Marfrío acaba de asinar un convenio colectivo de empresa no que o salario mínimo anual situarase en xaneiro do 2018 en 14.000 euros brutos anuais, 2.000 euros anuais máis que o salario fixado no convenio do sector.
O secretario xeral de CC OO-Industria de Pontevedra, Avelino García Martínez, compara o acordo logrado en Marfrío coa situación que vive o resto do sector de produtos do mar con procesos de conxelación e refrixeración onde concluíu sen acordo algún a negociación do convenio que afecta a un bo número de empresas situadas no porto de Marín.
Para Comisiones Obreiras "é evidente que as empresas do sector de elaborados do produto do mar teñen marxe para incrementar os salarios e mellorar as condicións de traballo, pero están a optar por unha política de salarios baixos para mellorar os seus beneficios empresariais", denuncia o sindicato.
CC OO vai realizar nos próximos días asembleas en todas as empresas do sector, para confeccionar unha nova plataforma reivindicativa, e insta á patronal Conxemar ao comezo de novas negociacións do convenio colectivo, "cunha nova perspectiva de mellora substancial de condicións de traballo e salarios", indica Avelino García.