A chegada das Festas do Carme a Marín tradúcese nunha nova edición da Festa dos Viños da IXP Ribeiras do Morrazo, unha cita que xa é parte imprescindible da programación festiva da localidade.
A presentación desta quinta edición celebrouse este martes na sede da adega local, Adega Ardán, e contou coa presenza da alcaldesa de Marín María Ramallo. Xunto a ela asistiron os concelleiros Pablo Novas e Maríán Sanmartín e os adegueiros das adegas participantes.
Fixo referencia á gran comuñón desta celebración coas Festas do Carme María Ramallo ao afirmar que "é a maridaxe perfecta para a programación festiva da fin de semana".
Comezará a programación da Festa dos Viños este mesmo venres 10 de xullo e estenderase até o domingo 12.
Ao longo dos tres días poderanse visitar as casetas das tres adegas participantes: Adega Ardán (Marín), Os Areeiros (Vilaboa) e Reboraina (Redondela).
Estas casetas estarán situadas na Alameda da localidade marinense e nelas poderase degustar e catar as distintas variedades que producen.
Todas estas adegas forman parte da asociación montada ao redor desta indicación xeográfica protexida (IXP Ribeiras do Morrazo), que trata de pór en valor a tradición vitivinícola da contorna.
A gastronomía tamén ocupará un lugar importante nesta celebración xa que, como acompañamento, estará tamén Rosa de los Vientos cunha caseta propia para ofrecer tapas de polbo en distintas elaboracións.
O horario para visitar e catar os diferentes produtos será o venres de 20:00 a 00:00 e o sábado e domingo de 12:00 a 15:00 e de 20:00 a 00:00.