O Concello de Marín continúa co proxecto de humanización da rúa Concepción Arenal. Unha actuación urbana que avanza de acordo cos prazos que se fixou a administración local de forma que se prevé que poida estar concluída a finais deste mes de maio.
O proxecto está confinanciado coa Axencia Galega de Infraestruturas, e esta segunda fase que se acomete conta cun investimento que supera os 653.000 euros. Este luns a obra centrouse nos labores de fresado e a partir de mañá seguirá coa pavimentación dos carrís de circulación.
A humanización de Concepción Arenal mellorará a mobilidade peonil e rodada nunha das vías centrais de Marín. Desta forma liquidaranse as conxestións de tráfico que se rexistraban pola estreiteza do antigo trazado dos carrís; e os viandantes gañarán espazo ao ampliarse as beirarrúas.
Ambas as dúas melloras conséguense coa supresión dunha das liñas de aparcamento.