O Concello de Marín reforzou a dotación da Policía Local coa incorporación de tres novos auxiliares, Jesús, Lucía e Manuel.
Os axentes pasan a formar parte do equipo co obxectivo de apoiar e complementar o traballo que desenvolve habitualmente o corpo de seguridade municipal.
A chegada destes efectivos permitirá incrementar os recursos humanos dispoñibles nun período especialmente intenso para a vila, marcado pola celebración de numerosos eventos, actividades culturais, festivas e deportivas, así como por un aumento da afluencia de persoas durante os meses de verán.
Os tres auxiliares xa participaron nunha das súas primeiras actuacións públicas con motivo da procesión do Corpus, un dos actos tradicionais do calendario marinense.
Durante a xornada tiveron a oportunidade de compartir uns momentos coa alcaldesa de Marín, María Ramallo, quen lles deu a benvida e lles trasladou os seus mellores desexos nesta nova etapa profesional.
A rexedora destacou a importancia do labor que desempeña a Policía Local durante todo o ano, especialmente nestas datas nas que o municipio rexistra unha maior actividade e precisa dunha atención especial en materia de seguridade, mobilidade e organización dos eventos públicos.
Con esta incorporación, o Concello busca garantir unha resposta máis eficaz ás necesidades da veciñanza e reforzar a presenza policial nas rúas nun dos períodos de maior dinamismo da localidade.