O Concello de Marín ultima servizos importantes para o óptimo goce das próximas festas do Carme. Dous deles son o transporte público para chegar ao municipio marinense e os espazos destinados a estacionamento para quen use os vehículos particulares.
A última novidade en relación aos aparcamentos é que o Porto cede unha parcela duns cinco mil metros cadradados situada á altura de Cantodarea. Devandito espazo estará operativo entre o 12 e o 16 de xullo, ambos inclusive, cun horario de 09.30 horas ás 04.00 horas da madrugada e totalmente gratuíto. A este lugar engádense os aparcamentos disuarios dos que dispón o Concello e que están sinalizados con lonas para facilitar a chegada aos devanditos emprazamentos.
Ademais, desde a aplicación 'Marín Smart' pódese consultar en tempo real a ocupación que rexistra cada un destes espazos de aparcamento e igualmente a súa localización.
Doutra parte, para facilitar o transporte a quen queira achegarse ata Marín nestas xornadas festivas, o autobús da liña Pontevedra-Marín amplía os horarios de maneira que a frecuencia deste servizo será cada media hora entre as 00.00 e as 04.30 horas entre os días 12 e 16 de xullo.
A alcaldesa María Ramallo, tamén trasladou unha petición á cidadanía do centro urbano marinense para que acudan aos actos festivos a pé e deixen os automóbiles "para as persoas que veñen das parroquias do rural ou veñen doutros concellos".