A Brigada Municipal de Obras do Concello de Marín procedeu estes días a iniciar os traballos de retirada da pasarela de madeira que conectaba co CEIP Sequelo.
O seu mal estado obrigou ao Concello a tomar a decisión de desmontala de forma definitiva, xa que, a pesar de estar pechada ao paso en varias ocasións, non sempre se respectaba a restrición, xerando unha situación de risco.
Ademais, esta retirada xa estaba prevista dentro das obras de renovación do colector do Río Lameira, que inclúe a creación dunha nova senda peonil na outra beira, moito máis segura e funcional. As obras xa están en marcha.
Desde o Concello recoñécese que estas intervencións poden xerar algunhas molestias, sobre todo na contorna escolar, pero pídese comprensión á cidadanía, lembrando que todos estes traballos suporán unha importante mellora para o barrio e as súas infraestruturas.
Por outra banda, o Concello de Marín tamén acomete estes días varias actuacións en distintos viarios que necesitaban unha intervención urxente. Nestes días, os traballos están a centrarse en zonas como Bexa, Ponte Guimeráns, O Campo e tamén no tramo entre Picotes e Santomé, onde se está renovando completamente o firme con novas capas de asfalto.
Estas obras non consisten só en tapar fochancas pois a deterioración destes camiños facía necesaria unha repavimentación integral para garantir unha condución segura.
A empresa COVSA foi a encargada de executar estas melloras, cun investimento aproximado de 25.000 euros. Segundo explicou o concelleiro de Medio Rural, Pablo Novas, o obxectivo é manter en bo estado toda a rede de estradas municipais, con labores constantes de mantemento.
Ademais, o Concello ten en marcha o Plan de Pavimentación de Camiños que xa chegou a lugares como Viñas Blancas e Pardavila. Actualmente estase traballando na contorna do Cemiterio de Santomé e no Camiño de Currás, e proximamente comezarán as melloras en zonas como Mogor-Praia de Portocelo, Cruceiro da Brea-San Blas, Moledo e O Pazo.
En total, este ambicioso plan contempla un investimento de 356.500 euros, financiados a través do Plan Máis Provincia da Deputación de Pontevedra.