Marín, unha vila que estará "ligada para sempre" a Leonor de Borbón

A princesa de Asturias, Leonor de Borbón, xa é filla adoptiva do Concello de Marín, municipio no que completou a súa formación militar naval e que a recibiu este luns con todas as honras.

Máis de duascentas persoas esperaban á princesa ás portas do concello, onde Leonor de Borbón chegou preto da unha do mediodía acompañada polo presidente da Xunta, Alfonso Rueda, e a ministra de Inclusión, Seguridade Social e Migracións, Elma Saiz.

Durante preto de cinco minutos, Leonor de Borbón quixo saudar aos presentes, que a recibiron entre aplausos e aclamacións de "viva a princesa", mostrándose moi riseira e cariñosa coa xente, coa que tamén fixo algunha foto.

Tras un sinxelo acto, no que se deu lectura ao acordo plenario polo que foi nomeada filla adoptiva do municipio, a alcaldesa de Marín, María Ramallo, fíxolle entrega dun pergamiño co título e a medalla oficial do Concello.

O pergamiño, elaborado a man pola artista María Sancho, está ilustrado con "cousas moi típicas de Marín", segundo explicou a rexedora, entre elas a ancestral danza das espadas, elementos de tradición mariñeira, as herbas de San Xoán ou o escudo oficial do municipio.

Ademais, a princesa Leonor asinou no libro de honra do concello, o mesmo no que tamén quedou plasmada a visita do seu pai, o rei Felipe VI, que en 1986 tamén foi nomeado fillo predilecto de Marín tras cursar os seus estudos na Escola Naval da vila.

Na súa dedicatoria, Leonor de Borbón deixou por escrito que "para todos os que pasamos pola Escola Naval Militar, Marín convértese na nosa casa. Acóllenos a todos como veciños e cando nos imos sabemos que nos espera sempre".

Para ela, continúa a súa mensaxe, "este sentimento é hoxe moito máis intenso cando me recibides na casa de todos como filla adoptiva", un título que agradece e que ela mesma asegura que "levarei sempre con moito orgullo".

"A princesa estará ligada sempre a Marín", destacou Ramallo, "do mesmo xeito que o está tras a súa formación á propia Escola Naval", xa que a herdeira ao trono "podía elixir calquera universidade do mundo e elixiu pasar un ano en Marín como parte da súa formación".

Durante a súa estancia en Marín, a alcaldesa cedeu á princesa de Asturias o seu bastón de mando porque, neses momentos, "era a máxima autoridade" e esa entrega era un "símbolo de distinción", explicou María Ramallo.

Ao remate do acto, a banda da Escola Naval de Marín, en presenza da propia Leonor de Borbón, estreou a peza 'La joven guardamarina' creada na súa honra.

O presidente da Xunta, pola súa banda, destacou que as homenaxes que recibiu a princesa de Asturias este luns en Galicia "simbolizan o que sente unha maioría moi importante do pobo galego, que é o agarimo cara á coroa".

A familia real, segundo Alfonso Rueda, "é un referente na vida institucional" e Galicia quería "testemuñar ese agarimo" e o agradecemento que sente cara a Leonor de Borbón "ao final deste case ano de estancia" na Escola Naval de Marín.

"Hoxe creo que quedou patente", subliñou Rueda, que defendeu que Galicia "é un pobo acolledor que abre os brazos a todo o mundo", celebrando que a relación entre esta terra e a princesa quede "establecida para sempre".

LEONOR, EN MARÍN "COMO UNHA GALEGA MÁS"

A princesa chegou a Marín tras recibir, en Santiago de Compostela, a Medalla de Galicia, a máxima distinción dunha comunidade autónoma na que durante os meses que pasou como parte da súa formación militar sentiuse "unha galega máis".

Así o afirmou nun discurso no que pronunciou varios parágrafos en galego e no que lembrou a súa estancia na ría de Pontevedra, onde a súa vida como gardamarina da Escola Naval de Marín foi, segundo reiterou, "intensa e esixente".

A pesar diso, Leonor de Borbón recoñeceu que "tamén puiden gozar do bo ambiente en cada lugar que pisei" e da comida que degustou durante a súa estancia en terras pontevedresas, "sobre todo, nos furanchos".

"Quédanos moi pouco para separarnos pero non vou ter morriña algunha porque a Galicia quero volver sempre", subliñou a princesa, que deu as grazas "de corazón" polas honras recibidas e que se sentiu "tan acollida e apoiada desde o primeiro día"

Galicia recibiu "cos brazos abertos" á herdeira ao trono, segundo ela mesma afirmou, que sentenciou que esta terra "case sen darme conta pasou a formar parte de min".

A PRINCESA RECIBIRÁ A GRAN CRUZ DO MÉRITO NAVAL

Xa o vindeiro mércores 16 de xullo, durante a entrega de reais despachos aos novos oficiais da Armada que finalizan o seu período de formación na Escola Naval de Marín, a princesa de Asturias recibirá a Gran Cruz do Mérito Naval con distintivo branco.

Esta condecoración seralle imposta polo seu pai, o rei Felipe VI.

Ademais, con motivo da finalización da súa formación naval, Leonor de Borbón ascenderá ao emprego de gardamarina de segundo (4º curso), o mesmo que o resto dos seus compañeiros, cos que realizou a súa formación durante o curso académico 2024- 2025.