A conselleira de Vivenda e Planificación de Infraestruturas, María Martínez Allegue, garantiu que todos os afectados polas expropiacións necesarias para o desenvolvemento do PIA de Mauro recibirán as correspondentes compensacións.
No caso dos que perdan a súa casa, segundo afirmou Martínez Allegue, terán a opción de acceder á vivenda de substitución "se así o desexan".
Sería tanto nun edificio residencial colectivo ou nunha vivenda unifamiliar das que se construirán en todo este ámbito situado entre San Amaro e O Marco.
A este respecto, a titular de Vivenda explicou que a Xunta de Galicia urbanizará unha zona do futuro polígono residencial "expresamente para esas vivendas de realoxo".
Ademais, engadiu que, se así o prefiren os afectados, o goberno galego construirá directamente esas vivendas que se lles entregarían aos expropiados.
Sobre as persoas que sexan titulares catastrais de terreos pero que non teñan vivenda serán atendidas adecuadamente na fase de expropiación que, segundo Martínez Allegue, "aínda non se iniciou".
"Polo tanto, tranquilidade", sostivo a conselleira, que prometeu que contactarán con todos os veciños afectados, cos que afirman que a comunicación "está aberta" para resolver con eles "calquera dúbida".
RAFA DOMÍNGUEZ CONVOCA OS VECIÑOS
A este respecto, o portavoz municipal do PP, Rafa Domínguez, convocou os veciños afectados por este desenvolvemento urbanístico a unha reunión que se celebrará o vindeiro xoves 7 de maio, ás 19:00 horas, no Centro Leste da Parda.
O líder popular asegura que quere "escoitar activamente as súas preocupacións" de residentes e propietarios da zona para trasladar as súas demandas, inquietudes e propostas á Consellería de Vivenda e Planificación de Infraestruturas.
"Estamos convencidos de que buscarán a mellor solución para todos", asegurou Domínguez, que afirma que o PIA que impulsa a Xunta nese ámbito é unha actuación "estratéxica" para ampliar a oferta de vivenda en Pontevedra.
Engade Pontevedra Viva como fonte preferida de Google de balde
Mantente informado coas últimas noticias de actualidade.