Coa publicación oficial dos orzamentos municipais este mércores 25 no Boletín Oficial da Provincia (BOP), o goberno municipal de Pontevedra anunciaba a posta en marcha do plan de obras para o presente exercicio.
Trátase dunha batería de proxectos que mobilizan máis de 6,2 millóns de euros.
O alcalde, Miguel Anxo Fernández Lores, informou dos avances en tres mesas de contratación que definen o modelo de cidade para os vindeiros meses: eficiencia enerxética, recuperación de espazos urbanos e novas conexións naturais.
O contrato de maior contía económica foi a adxudicación da renovación lumínica na zona norte e leste do centro urbano.
A empresa Setga SLU será a encargada de executar esta intervención por un importe de 2.272.246,90 euros, que inclúe unha garantía de cinco anos.
A actuación, que comezará no mes de marzo e terá un prazo de execución de seis meses, supón a substitución de 2.304 luminarias convencionais por equipos LED de alta eficiencia.
Barrios e rúas como a Cruz Vermella, San Antoniño, Benito Corbal, A Eiriña, A Parda ou O Gorgullón experimentarán unha mellora substancial na intensidade lumínica.
Máis alá da estética, os datos técnicos son notables: o Concello logrará un aforro do 77 % no consumo eléctrico e deixará de emitir 651 toneladas de CO2 anuais.
"Con esta obra, o 83 % de toda a iluminación da cidade e o rural xa será LED", destacou Lores.
MOLLAVAO
As mesas de contratación tamén serviron para despexar o camiño da reforma de Rosalía de Castro e o denominado "bypass" de Mollavao.
Seis empresas concorren a este proxecto que conta cun financiamento de 3,7 millóns de euros. Aínda que a oferta económica máis vantaxosa foi a de E.C. Casas (3,16 millóns), a mellor valoración técnica recaeu en COVSA.
O proxecto estrutúrase en dúas fases críticas: primeiro construirase o "bypass" de 100 metros que conectará a avenida de Marín mediante dúas glorietas, o que permitirá pechar ao tráfico un carril de Rosalía de Castro para transformala nunha rúa con prioridade peonil e amplas beirarrúas.
O alcalde amosouse "encantado como unhas castañolas" tras resolver o complexo "vía crucis administrativo" co goberno do Estado, agradecendo o labor de mediación da senadora nacionalista Carme da Silva.
A previsión é que as máquinas comecen a traballar antes deste vindeiro verán.
Finalmente, o Concello deu un paso máis na conexión peonil entre a Xunqueira da Gándara e o parque forestal da Tomba.
Este proxecto, financiado polos fondos europeos NextGenerationEU, recibiu tres ofertas económicas que oscilan entre os 147.000 e os 174.000 euros.
A intervención creará un itinerario seguro de 1,8 quilómetros que incluirá unha pasarela de madeira sobre a marisma.