O Concello de Pontevedra presenta un completo programa para celebrar unha nova edición de 'A Noite dos Calacús', que se desenvolverá do domingo 26 ao venres 31 de outubro e que combina tradicións ancestrais, actividades para todas as idades e a participación activa da hostalaría local.
A apertura das actividades terá lugar o domingo 26, coas visitas guiadas ao Cemiterio de Santo Amaro, baixo o título “A Pontevedra do alén”.
Estes roteiros permitirán ao público infantil e familiar coñecer historias e misterios do cemiterio a partir das 12.00 horas, mentres que ás 18.00 horas se celebrará a sesión para público adulto, enfocada na historia do camposanto e das persoas que descansan nel.
Entre os días 29 e 31 de outubro, as panadarías Acuña, Amásame Bakery Lab, Xeve, A Devesa e Solla ofrecerán o tradicional Pan de Ánimas, unha receita histórica que conecta aos vivos cos defuntos a través dunha tradición gastronómica única da comarca.
O venres 31, día central da celebración, o Mercado de Pontevedra acollerá desde as 17.00 horas unha serie de obradoiros para nenos e nenas, que inclúen colares de zonchos, cociña de defuntos, maquillaxe, disfraces de pantasmas e tallado de calacús.
Os contos de medo e arrepíos estarán a cargo de V de minúscula, e en todos os casos é preciso consultar horarios, idades e inscrición previa onde corresponda.
Ás 20.30 horas, a tradicional Procesión das Ánimas percorrerá o centro histórico da cidade, desde O Mercado ata a Ferraría, pasando polas rúas Serra, Real, praza García de la Riega, Fonte dos Tornos, Curros Enríquez, Soportais, Conde de San Román, praza da Verdura, rúa Sarmiento, praza de Méndez Núñez e baixada pola rúa César Boente.
A comitiva estará formada pola Aula Municipal de Teatro de Pontevedra e a música de Adarve, e poderá sumarse calquera persoa que se achegue, mentres que a iluminación das rúas se reducirá para crear unha atmosfera máis espectacular.
O Concello anima a toda a cidadanía a acudir caracterizada con sabas, camisóns, roupas brancas ou disfraces de pantasma e a decorar rúas, balcóns e escaparates coa temática tradicional galega: cabazas, candeas, castañas, esqueletos, corvos e curuxas.
A partir das 22.00 horas, a programación continúa coa animación nos locais de hostalaría, que ofrecerán menús, tapas e cócteles exclusivos como o Cóctel Calacú, elaborados especialmente para a ocasión.
O Concello recomenda consultar o código QR do programa para coñecer todos os establecementos participantes e as propostas gastronómicas dispoñibles.