A cidade de Pontevedra foi convidada a participar na Mesa pola Mobilidade de Melilla, integrada por Melilla Con Bici, a Federación Ciclista de Melilla, ANPAs e case todos os partidos políticos da cidade en colaboración con Guelaya-Ecoloxistas en Acción.
Ata a cidade autónoma desprazarase o xefe da Policía Local, Daniel Macenlle, os días 29 e 30 de maio.
Neste encontro, organizado para debater a forma de mellorar en seguridade viaria, Macenlle explicará as medidas adoptadas nos últimos anos en Pontevedra, como a adopción da zona 30, medidas de acougado de tráfico ou a implantación do modelo de convivencia entre peóns e tráfico rodado nalgúns espazos do centro da cidade, aspectos reflectidos nas estatísticas con cero falecidos por atropelo no centro urbano desde febreiro de 2011.
A Mesa pola Mobilidade de Melilla inclúe un encontro informal e de reflexión cos integrantes dos diferentes colectivos participantes, unha rolda de prensa, a visita á concellería de Seguridade Cidadá e unha conferencia aberta a toda a cidadanía.