A mellora do acceso ao campo de fútbol de Salcedo, "a piques de comezar"

As obras de mellora dos accesos ao novo campo de fútbol de Salcedo están "a piques de comezar".

Trátase, segundo o Concello de Pontevedra, do "paso definitivo" para completar esta infraestrutura deportiva, cuxos traballos foron paralizados até agora polas inclemencias meteorolóxicas dos últimos meses.

A actuación conta cun orzamento de 43.567,21 euros (IVE incluído).

Para ultimar os detalles do inicio das obras, as concelleiras de Rural, María José Abilleira, e de Deportes, Anabel Gulías, acompañadas de representantes da construtora, visitaron a zona onde se acometerán as melloras.

A actuación centrarase na mellora do firme e a drenaxe do camiño de acceso á instalación.

Os traballos realizaranse no camiño existente, concretamente sobre unha superficie de 5.660 metros cadrados cedida gratuitamente pola comunidade de montes de Salcedo.

Durante a visita, Gulías destacou a importancia de pechar este ciclo e "rematar unha dotación que será un referente".

A construción deste campo foi unha obra "con moitas complicacións técnicas e administrativas", recoñeceu a edil, "pero o noso compromiso coa parroquia de Salcedo e cos clubs deportivos foi sempre firme".

"Con esta mellora dos accesos, garantimos que todas as persoas poidan gozar destas instalacións nas mellores condicións e con total seguridade", sinalou a concelleira.

Pola súa banda, María José Abilleira valorou a colaboración veciñal, á que agradeceu a súa "xenerosidade", sen a cal non sería posible "acondicionar uns accesos axeitados e integrados na nosa contorna natural".

A mellora destes accesos culmina un proxecto moi demandado pola parroquia de Salcedo e que se enfrontou, desde o seu inicio, a numerosas dificultades.

Desde o Concello lembran que o primeiro intento paralizouse pola quebra da adxudicataria inicial (Galitec), o que obrigou a resolver o contrato e readjudicar a obra a Prace-Servizos e Obras por 1.959.886,16 euros.

As obras reiniciáronse no verán de 2023 e o campo foi recibido polo Concello na primavera de 2024.

O complexo ocupa 37.537 metros cadrados cedidos pola comunidade de montes. 24.537 metros cadrados son para o campo, 7.355 metros cadrados para o futuro aparcadoiro e 5.660 metros cadrados para os accesos.

Conta cun terreo de herba artificial homologable pola FIFA de 100x58 metros, catro vestiarios para xogadores, dous para árbitros, enfermaría, cantina, aseos públicos, almacéns (incluído un para bicicletas), aula da natureza e unha bancada elevada.