Como cada ano, cando se achegan as datas máis entrañables do calendario, as cociñas dos hospitais Montecelo e Provincial ponse ao choio para que o Nadal chegue tamén a quen deben pasar estas xornadas ingresados ou de garda.
Os servizos de Hostalaría sanitaria xa teñen listos os menús especiais cos que acompañarán a Noiteboa, o Nadal, a Noitevella, o Ano Novo e o Día de Reis nos centros do Sistema Sanitario Público.
No Hospital Montecelo, a cea de Noiteboa comezará cunha crema de marisco, lagostinos ao vapor e bacallau con allada e coliflor, rematados cun surtido de doces do Nadal. O día de Nadal, a comida incluirá crema de ave con picatostes, salpicón de marisco e xarrete estofado con pataca panadeira e verduriñas, con tronco de Nadal ou piña natural como sobremesa.
A noite de Fin de Ano tampouco faltará á cita gastronómica, con gambón a dúas salsas, crema de espárragos trigueiros, rape con ameixas, surtido de doces do Nadal e, por suposto, as tradicionais doce uvas. Para recibir o Ano Novo, servirase sopa de ave con tropezóns, vieira ao forno e bitokes de tenreira con patacas 'puentenuevo' e cogumelos, seguidos de torta de xema ou macedonia de froitas natural. O broche final chegará o Día de Reis, con sopa reina de tenreira, froitos do mar no seu mollo, pavo de Reis con pataca asada e pemento ao forno, e pera en mollo de laranxa e canela como sobremesa.
Detrás de cada un destes menús hai unha complexa organización que se adianta quenda a quenda para garantir que os pratos poidan elaborarse a tempo e coa máxima calidade. As cociñas hospitalarias son espazos de intensa actividade diaria, onde técnicos en dietética e nutrición, persoal administrativo, gobernantas, piques e cociñeiros traballan de forma coordinado co obxectivo común de que a alimentación sexa un aliado máis na recuperación dos pacientes.
Cada bandexa servida é o resultado dunha coidadosa planificación. Os menús buscan ser equilibrados, con baixo contido graxo, cantidades axeitadas e un emplatado coidado, sempre con produtos saudables tanto para pacientes como para o persoal sanitario de garda. Antes de chegar á cociña, cada alimento pasa por unha revisión exhaustiva de hidratos de carbono, lípidos e proteínas, supervisada polo equipo de Dietética e Nutrición.
Así, mesmo en Nadal, os hospitais públicos ofrecen unha alimentación variada e equilibrada, con peixes e carnes magras, evitando ultraprocesados, moderando o achegue calórico e fomentando o consumo de verduras e froitas.