Fisioterapia ten nova decana. Mercedes Soto substituirá á anterior responsable desta facultade pontevedresa, Eva Lantarón, nomeada vicerreitora do campus de Pontevedra. Iso si, por agora, farao en funcións e co encargo de convocar novas eleccións en seis meses.
Docente do departamento de Bioloxía Funcional e Ciencias da Saúde, Soto exercía como vicedecana de Fisioterapia desde 2018, cargo que pasará a desempeñar agora a profesora Iria da Cuña, mentres que Rocío Abalo continuará á fronte da secretaría académica.
"É algo que vén dado polas circunstancias, pero o que teño claro é que vou facelo o mellor posible para que a andaina positiva da facultade continúe nese mesmo sentido", destacou a nova decana, que imparte clase na facultade desde 2005.
Asegura afrontar esta nova etapa "con ilusión" e arroupada por un equipo de persoas "de gran valía" que teñen claro o camiño cara ao que debe ir a titulación, "contribuíndo á creación de profesionais cunha formación da máxima calidade".
Como principal reto no “futuro inmediato”, a decana en funcións sinala a posta en marcha do novo Máster en Exercicio Terapéutico e Funcional en Fisioterapia, que contará con 20 prazas e que comezará a impartirse no mes de setembro.
Ademais, o centro atópase actualmente inmerso no proceso de acreditación do seu sistema de garantía interno de calidade e trababa para dotar no futuro á facultade dun programa de doutoramento, así como alcanzar un maior número de prazas de titulares e catedráticos.
Nese sentido, Mercedes Soto lembra que se trata dun "camiño longo" que irá máis aló deste mandato en funcións pero no que fai falta, sinala, "seguir completando etapas".
Engade Pontevedra Viva como fonte preferida de Google de balde
Mantente informado coas últimas noticias de actualidade.