As máis de 5.000 racións servidas entre os dez establecementos que participaron na primeira edición da ruta de tapas de Caldas de Reis confirman o éxito desta iniciativa.
Nesta cita, que aspira a consolidarse no tempo, o gañador foi o Mesón Bermaña.
A súa proposta foi a que logrou a maior puntuación, combinada entre os votos do público (60%) e do xurado profesional (40%), integrado por Coque Fariña, Xoanqui Ameixeiras e Fran Jamardo.
O segundo posto foi para o Bar Toque e completou o podio o Bar Sena.
Ademais, o Bar D’Toxos obtivo unha mención especial ao ser a súa tapa a que acadou un maior número de votos por parte da clientela.
"Foron tres xornadas de gran dinamización para o sector", asegurou o presidente da Asociación de Hostalería de Caldas de Reis, Jesús Fariña, que confirmou que a entidade xa está a pensar na seguinte edición do certame, que terá lugar xa no ano 2027.
Houbo tamén sorteos de agasallos entre as persoas que consumiron as tapas e participaron nas votacións, entre eles vales de 60 euros para gastar nos establecementos ou mesmo dous abonos para a vindeira edición do festival PortAmérica.
O alcalde de Caldas, Jacobo Pérez, celebrou que se impulsen iniciativas que "fagan medrar o noso concello", e que consolidan o municipio como referencia do interior da provincia.
Esta ruta de tapas, segundo os seus organizadores, atraeu público de toda a comarca.