O subdelegado do Goberno en Pontevedra, Abel Losada, supervisou os preparativos do dispositivo que permitirá iniciar a reparación do asfalto en toda a provincia da N-550, incluído o tramo urbano de Caldas de Reis, a N-550a, despois da Semana Santa.
O operativo contará cun investimento de 2 millóns de euros, enmarcado dentro do Plan Especial de Reparación e Conservación de Estradas do Estado en Galicia, que o Goberno central executa en Pontevedra cun orzamento global de 12 millóns de euros.
Segundo Losada, os traballos abranguerán todos os tramos deteriorados da N-550 desde o río Ulla ata O Porriño, así como o antigo trazado á entrada de Caldas de Reis, desde a rotonda de Tivo ata a ponte do Umia.
O subdelegado detallou que, na N-550, 1,8 millóns de euros se destinarán á mellora de tramos con deficiencias en concellos como Pontecesures, Valga, Portas, Caldas de Reis, Barro, Pontevedra, Vilaboa, Soutomaior, Redondela, Mos e O Porriño. No caso da N-550a, o investimento previsto é de 200.000 euros, centrado na entrada de Caldas de Reis.
Paralelamente, o subdelegado informou ao alcalde de Caldas, Jacobo Pérez, que comezarán os traballos de asfaltado integral de case 9 quilómetros da N-640, incluíndo o paso polo centro urbano.
O proxecto, cun orzamento de 2.296.502 euros e un prazo de execución de 10 meses, enmárcase no programa EFAPAVES (Pavimentos Asfálticos Eficientes) do Ministerio de Transportes, utilizando mesturas bituminosas novas que buscan mellorar a sustentabilidade e reducir as emisións de carbono.